Բազկամարտի հուշամրցաշար՝ անվանի մարզիկի ծննդավայրումԿոտայքի մարզի Քաղսի գյուղում կայացավ բազկամարտի Հայաստանի բազմակի չեմպիոն, բազմաթիվ միջազգային մրցաշարերի հաղթող Արթուր Ավետիսյանի անվան հուշամրցաշարը: Արդեն 2-րդ տարին անց կացվող մրցաշարին մասնակցում էին մինչև 18 տարեկան 50-ից ավելի մարզիկներ Երևանից, Գեղարքունիքի, Շիրակի, Կոտայքի մարզերից: Մրցաշարի անցկացման վայրը պատահական չէր ընտրված: Քաղսի գյուղն անվանի բազկամարտիկ Արթուր Ավետիսյանի ծննդավայրն է: Մարզիկի մտերիմները և ընկերները ակնածանքով էին հիշում մարզական ասպարեզում նրա արձանագրած հաջողությունների մասին և ցավով փաստում, որ նա այլևս մեզ հետ չէ: Արթուրը դաժանաբար սպանվել է 2008թ-ին ՌԴ -ում: Արթուրի մարզիչ, բազկամարտի Հայաստանի բազմակի չեմպիոն, ծանրամարտի ԽՍՀՄ սպորտի վարպետ, <<Կոտայքի դյուցազն>> կոչումը կրող Գրիգոր Պողոսյանը շնորհակալություն հայտեց ծառայության մեջ գտնվող իր սաներին, որոնց մտահաղացմամբ նախորդ տարի կազմակերպվել էր հուշամրցաշարը: Նա հույս հայտնեց, որ մրցաշարն էլ ավելի մասսայական կդառնա և կընդգրկի Հանրապետության բոլոր մարզերը, միաժամանակ հավաստիացնելով, որ այն ավանդական է դառնալու: Սպորտի և երիտասարդության հարցերի նախարարության աշխատակազմի մասսայական սպորտի բաժնի պետ, բազկամարտի ֆեդրացիայի գլխավոր քարտուղար Սուրեն Պրազյանը yerkir.am-ի հետ զրույցում կարևորեց գյուղական համայնքներում մարզական միջոցառումների անցկացումը: Ըստ նրա՝ նման մրցաշարերը խթանում են գյուղական սպորտի զարգացմանը և նոր հեռանկարներ ստեղծում գյուղի մարզիկների համար: Բազկամարտի երիտասարդական ասոցացիայի նախագահ Արտավազդ Նալբանդյանն էլ իր հերթին գոհունակություն հայտնեց միջոցառման կազմակերպիչներին: 8 քաշային կարգերում 1-ից 3-րդ տեղը զբաղեցրած մարզիկները պարգևատրվեցին մեդալներով և պատվոգրերով, իսկ բացարձակ քաշային կարգում(աջ և ձախ ձեռքով) չեմպիոն ճանաչված մարզիկը՝ նաև գավաթով: Մրցաշարի ամենաուժեղ մարզիկ ճանաչվեց Գրիգոր Պողոսյանի սան Արամ Հարությունյանը, ով ներկայացնում էր Կոտայքի մարզի Լեռնանիստ գյուղը:Նրան պարգևատրեց ՀՀ Պաշտպանության նախարարության փոխգնդապետ Արսեն Մանուկյանը:
| 
