Բազկամարտի ասոցիացիա մտնելու համար պետք է նախ կարողանաք ասոցիացիայի դուռը բացել: Առաջին անգամ փորձելիս ինձ մոտ չստացվեց: Փաստորեն, ուժերի ստուգումը հենց այդտեղից էլ սկսվում է:
Միգուցե հիմա չլիներ Բազկամարտի երիտասարդական ասոցիացիան, եթե ԵՊՀ ինֆորմատիկայի և կիրառական մաթեմատիկայի ֆակուլտետում ուսանելու տարիներին ԵՊՀ Սպորտի նախագահ, հետո նաև Ուսանողական խորհրդի նախագահ Արտավազդ Նալբանդյանը չկազմակերպեր բազկամարտի առաջնություններ: Այդ տարիներին ՈՒԽ-ի ողջ բյուջեն վերջանում էր նրա մրցաշարերի համար: Ինչպես Արտավազդն է խոստովանում, հետո այլևս ֆինանսավորում չէր լինի, պետք էր նոր կառույց ստեղծել: Շուրջ հինգ տարի ուսանողական առաջնություններ կազմակերպած Արտավազդը Էդուարդ Սահակյանի հետ 2010 թվականի փետրվարի 4-ին հիմնադրեց լուրջ նպատակների և հաջողությունների մեծ ձգտումով ասոցիացիա: Հետագայում խորհրդի կազմի մեջ են մտել Գրիշա Սահակյանը և Աշոտ Սոխակյանը:
Ձեզնից ո՞վ չի փորձել գոնե մեկ անգամ դպրոցական սեղանի վրա ծալել ընկերոջ ձեռքը ու հետո էլ պարծենալ ուժեղ մկաններ ունենալու համար: Պարզվում է, այսպիսի ուժեղ տղաներ մեզ մոտ շատ կան: Բազկամարտի ասոցիացիայի նպատակը հենց երիտասարդների շրջանում բազկամարտը տարածելն է, նոր մարզիկներ գտնելը: Շատերը ուղղակի պրոֆեսիոնալ բազկամարտի, դրա կանոնների և հմտությունների մասին չգիտեն: Ասոցիացիան այն օղակն է, որը կապում է բազկամարտի սիրահարներին բազկամարտի աշխարհին, ինչու չէ նաև հնարավորություն տալիս այլ մարզիկների դրսևորվել նաև այս ոլորտում:
Ձեռքբերումների մասին Արտավազդ Նալբանդյանը մեծ ոգևորվածությամբ է խոսում. «2 տարվա ընթացքում հիմնադրել ենք Հայաստանում աղջիկների բազկամարտ, դա նոր բան էր մեզ համար: Ունենք երիտասարդներ, որ այս տարիների ընթացքում դարձել են Հայաստանի չեմպիոններ: Դարձանք միջազգային ֆեդերացիաների անդամ: Համագործակցեցինք Վրաստանի Բազկամարտի ֆեդերացիայի հետ: Ամեն տարի Բաթումիում անցկացվող ծրագրեր ունենք: ՞Բազե՞ հավաքի հետ ենք համագործակցում, բազկամարտի առաջնությունները մենք ենք կազմակերպում: Ռուսաստանում գործող ֆեդերացիայի հետ ունենք անմիջական կապեր: Մարզիկների ենք տանում այնտեղ մարզվելու, դասընթացների, սեմինարների մասնակցելու: Գիտենք, որ բազկամարտը ամենաշատը զարգացած է Ռուսաստանում»:
Այս տարիների ընթացքում երիտասարդ կառույց լինելով հանդերձ ասոցիացիան մեծ հաջողություններ է գրանցել: Դա է վկայում սեպտեմբերի 22-ին Ուկրաինայի Յալթա քաղաքում տեղի ունեցած Արմլիֆտինգի աշխարհի առաջնությունը: Հայաստանի հավաքականը ներկայացնող (Բազկամարտի երիտասարդական ասոցիացիայի սան) Էմիլ Ամիրշատյանը զբաղեցրել է մրցանակային առաջին տեղը:
Բազկամարտի երիտասարդական ասոցիացիան խմբեր ունի նաև Հայաստանի մարզերում, մասնաճյուղեր կան Շիրակի մարզում, Արմավիրում, Սիսիան, Վանաձոր քաղաքներում, Սևանում, Աբովյանում:
Ասոցիացիան ունի միջազգային կարգի այնպիսի դահլիճ, որ Հայաստանում մեկ այլ տեղ չկա, այնպիսի մարզասարքեր, որոնցից աշխարհում մի քանի հատ են: Կհամոզվեք, եթե գոնե մեկ անգամ ոտք դնեք այնտեղ: Եվ ունեն մթնոլորտ, որ նույնիսկ բնագավառից ամենահեռու մարդուն ստիպում է գոնե մի պահ կանգ առնել ու հետաքրքրությամբ նայել, թե ինչպես են մարզվում, և վերջապես ինչ ասել է բազկամարտ: Փորձնական պարապմունքի ժամանակ Արտավազդը տղաների աջակցությամբ մանրամասն բացատրեց բազկամարտի կանոնները, հետո անցավ մրցավարության: Տղաները թեև գիտեին, որ դա ուղղակի փորձ էր, բայց լավագույնս էին ուզում ցուցադրել իրենց ուժը: Ամբողջ մարմինը կարծես մի պահ սառչում էր, երակները անզուսպ ցցվում էին, և ևս մի քանի վայրկյան ու հաղթողը պարզ էր դառնում: 17-ամյա Կարենը օրվա հերոսն էր, նա հաղթում էր գրեթե բոլորին: Արտավազդը որպես մարզիչ այնքան հասանելի էր բացատրում կանոնները և խախտումները, որ ես էլ ակամայից սկսեցի զգալ, թե որտեղ կա բացթողում և որտեղ է կանոններից դուրս:
Արտավազդ Նալբանդյանը մարզում է 2008 թվականից, տվել է մի քանի Հայաստանի բազմակի չեմպիոններ: Ռուսաստանի սպորտի վարպետ է, 22 տարեկանում ՀՀ վաստակավոր մարզիչ: Մարզչական կազմը մեծ է և ուժեղ. մարզիչներն են Էդուարդ Սահակյանը, Ռուդոլֆ Գրիգորյանը, ընդհանուր ֆիզիկական պատրաստվածությունը մարզում է Գագիկ Տոնոյանը: Երեխաները 3-4 ամսվա ընթացքում արդեն հաղթանակներ են ունենում:
Բազկամարտը օլիմպիական մարզաձև չէ, բայց նպատակ կա այդպիսին դարձնելու: Նախագահի խոսքով բոլոր չափանիշներով համապատասխանում են: Ասոցիացիան պետական հովանավորություն չունի, թեև ըստ նախագահի նրանք շատ-շատերի են դիմել:
Համագործակցում է մոտ 27 երկրների ֆեդերացիաների հետ: «Արդեն 12 երկրից ունեցել ենք հրավերներ: Նույնիսկ այնքան շատ հետաքրքրություն ենք ներկայացնում, որ իրենք պատրաստ են լինում մեր այցի ֆինանսական հարցերը լուծել»,-վստահեցնում է ասոցացիայի նախագահը: -Շատերը այս ամենի մեջ քաղաքական ենթատեքստ են տեսնում, բայց դա այդպես չէ, մենք այս ամենը անում ենք մեր վաղվա սերնդի, մեր հայ ազգի ապագայի համար: Մտածում են նաև, որ մենք այս ասոցիացիայի միջոցով մեծ գումարներ ենք աշխատում, բայց մենք մեր գրպանից ավելի շատ ծախսում ենք, քան օգտվում: Մենք ահռելի ժամանակ ու գումար ենք ծախսում: Խանգարողը հենց այդ տրամադրվածությունն է: Մեր ազգի մեջ էլ կան այնպիսիները, որ ամեն կերպ փորձում են խանգարել, չթողնել մեզ աճի տեղ: Բայց նրանք այդքան ուժեղ չեն, որ մեզ համար խոչընդոտ հանդիսանան»:
2013 թվականի հետ կապված կան մի շարք պլաններ` Եվրոպայի, Աշխարհի առաջնություններն են, որտեղ շատ մեծ է մեդալների հավանականությունը: «2013թվականին Աշխարհի Ուսանողական առաջնությունն ենք մեզ մոտ անցկացնելու, արդեն բազում հայտեր կան»: Փորձում են նաև մարզային թիմեր հավաքել, մրցումներ անցկացնել մարզերի միջև:
Ասոցիացիայի համար կարևոր նպատակ է դարձել նաև հենաշարժական ապարատի խնդիրներ ունեցողներին ուշադրության կենտրոնում պահելը: Արտավազդ Նալբանդյանը ամսվա մեջ գոնե 3 անգամ գնում է Գյումրի և նրանց հետ մարզումներ անցկացնում:
Բացի նրանից, որ այլ սպորտաձևերում գործող մարզիկներ կարող են զբաղվել բազկամարտով, կան նաև հատուկ երեխաների համար խմբեր, որտեղ ընդունելությունը սկսվում է 10-12 տարեկանից: Իսկ եթե ուղղակի ցանկություն կա սիրողական պարապունքների համար, ապա այդպիսի խմբեր նույնպես կան:
Հայաստանում առաջին անգամ թողարկում են ուսուցողական ֆիլմեր, տպագրում գրքեր` «Բազկամարտի կանոնադրություն», «Բազկամարտի ձևերը և տեսակները», այցելում են նաև դպրոցներ, բուհեր, անց կացնում դասախոսություններ ու սեմինարներ: «Բոլորը եկել են, համախմբվել են, տարվա մեջ գոնե մեկ օր ապրել են սպորտային կյանքով: Կարևորը այն է, որ նրանք տեսնեն թե ինչ մարզիկներ ունենք, իմանան բազկամարտի մասին և ինչու չէ հետո իրենց ապագան կերտեն»:
Արտավազդ Նալբանդյանը խորհուրդ է տալիս չվախենալ: Ճիշտ է` ֆինանսական դժվարությունը կա, բայց կունենան ամուր առողջություն, առողջ ապագա: «Չենք խոստանում, որ բոլորը կլինեն մեդալակիրներ, բայց միգուցե շատերը գտնեն իրենց տեղը: Հավատացեք, երբ հաղթանակի համը մեկ անգամ զգում եք, հետո դժվար է թողնել»:
